Salman Khan ke fans Bigg Boss 20 ka besabri se intezar kar rahe hain. Social media par show ki premiere date ko lekar kai tarah ki khabrein saamne aa rahi hain. Kuch reports mein dawa kiya gaya tha ki Bigg Boss 20, 21 September se shuru hoga, lekin sources ke mutabik abhi tak makers ne koi official premiere date announce nahi ki hai.
Jaankari ke anusaar, agar sab kuch planning ke mutabik raha, toh Bigg Boss 20 October ke pehle hafte mein shuru ho sakta hai. Show ki final date kai factors par nirbhar karegi, jismein Khatron Ke Khiladi ki performance, production scheduling aur Salman Khan ki shooting commitments shamil hain.
Sources ke mutabik, Salman Khan August ke aakhir tak Bigg Boss 20 ka pehla teaser launch kar sakte hain, jabki September ke pehle hafte mein show ka grand promo shoot hone ki sambhavana hai.
Filhaal, jo bhi dates social media aur media reports mein viral ho rahi hain, unhe tentative schedule maana ja raha hai. Bigg Boss 20 ki official announcement ka fans ko ab bhi intezar hai.
