गोव्यातील डिचोली पोलिसांनी संशयितरीत्या फिरत असलेल्या दोघा मंगळसूत्र चोरांना अटक केली. दोघेही अस्नोडे जंक्शनजवळ एका मोटरसायकलवरून फिरत होते आणि वयोवृद्ध महिलांना अडवून त्यांची फसवणूक करण्याचा प्रयत्न करत होते.
उपनिरीक्षक एस. कामत आणि पोलीस कॉन्स्टेबल दयेश खांडेपारकर यांनी त्यांच्यावर गुप्तपणे लक्ष ठेवले. पोलिसांनी त्यांना रोखण्याचा प्रयत्न केला असता ते पळून जाण्याचा प्रयत्न करू लागले. मात्र, पोलिसांनी पाठलाग करून दोघांना ताब्यात घेतले.
अटकेनंतर त्यांच्याकडून बनावट पोलीस ओळखपत्र, फेस मास्क, दगड आणि काचेच्या बांगड्या जप्त करण्यात आल्या. त्यांच्याकडे असलेली मोटरसायकल चोरीची असल्याचा संशय पोलिसांनी व्यक्त केला आहे.
संशयितांनी आपली ओळख गुलाम शिराज अब्बास (४० वर्षे, सांगली, महाराष्ट्र) आणि असदुल्ला अफजल अली (३५ वर्षे, बिदर, कर्नाटक) अशी दिली आहे. त्यांनी २० डिसेंबर २०२५ रोजी डिचोलीत एका महिलेला फसवून तिचे मंगळसूत्र चोरल्याची कबुली दिली आहे.
या प्रकरणाचा अधिक तपास पोलीस निरीक्षक विजय राणे यांच्या मार्गदर्शनाखाली आणि पोलीस अधीक्षक हरिश्चंद्र मडकईकर यांच्या देखरेखीखाली सुरू आहे.
